.UZ domen zonasi 30 yoshda!

Shu munosabat bilan UZINFOCOM davlat idoralari, IT-kompaniyalar, internet-provayderlar, shuningdek, .UZ hududidagi domen ro‘yxatga oluvchilar vakillari ishtirokida tantanali tadbir uyushtirdi.

Notiqlar orasida nufuzli xalqaro tashkilotlar vakillari ham bor:

• ICANN (Domen nomlari va IP-manzillarni boshqarish korporatsiyasi),
• H3C Technologies (raqamli infratuzilma uchun global yechimlar yetkazib beruvchisi),
• RIPE NCC (Yevropa, Yaqin Sharq va Markaziy Osiyoni qamrab olgan mintaqaviy internet ro‘yxatga olish markazi),
• APTLD (Osiyo-Tinch okeani mintaqasi mamlakatlarining yuqori darajadagi milliy domenlari birlashmasi),
• UNESCO hamda .AZ (Ozarbayjon), .AM (Armaniston), .BY (Belarus), .IN (Hindiston), .KG (Qirg‘iziston), .KZ (Qozog‘iston), .RU/.РФ (Rossiya) kabi yirik milliy domen registraturalarining vakillari.

Tadbir dasturi tematik panel sessiyalarini o‘z ichiga olgan bo‘lib, unda mehmonlar global tarmoqning asosiy raqamli tendensiyalari va muammolarini, xavfsizlik uchun eng so‘nggi yechimlarni, yangi protokollar va texnologiyalarni joriy etishni, domen va xosting xizmatlarini targ‘ib qilish strategiyalarini, shuningdek, domen kimoshlari, sun’iy intellekt, blokcheyn va NFT’ni internet ekotizimida qo‘llash masalalarini muhokama qildilar.

.UZ milliy domen hududida IPv6 protokolini qo‘llab-quvvatlashning ishga tushirilishi tadbirning alohida e’tiborga molik jihati bo‘ldi - bu mamlakat tarmoq infratuzilmasini zamonaviylashtirish yo‘lidagi muhim qadamdir.

Bundan tashqari, UZINFOCOM (.UZ) va Qozog‘iston tarmoq axborot markazi KazNIC (.KZ) o‘rtasida ikki tomonlama hamkorlikni rivojlantirish, domen hududlari va internet infratuzilmasini boshqarish sohasida bilim almashish hamda qo‘shma tashabbuslarni amalga oshirishga qaratilgan memorandum imzolandi.